ich bèn eine gank
tösje aanvang en ènj
ich bèn eine gank
van aanvang pus enj
dènk ich
in den aanvank
geef ut mich neit
in ut enj geef ut mich neit
goandentaere
van niks noa nirge17:46 18-2-2012
ken ich zeen

ich vriej mit de aerd
ich vriej mit de sjterre
ich vriej mit de zeej
ich vriej mit ut bruijend rotte van laeve
ich goan op in duujzelende sjtilsjtandj
ich goan op in sjitterende bewaeging
ich goan op in ut röstig roaze
ich goan op in zuit ruujkend zenge
neit te sjtille
in eine ummer trükkummende tèl

ich weit dèt ut mich geuf
doe wits dèt ut dich geuf
doe wits dèt ut mich geuf
ut geuf mich in dich
ich weit dès doe wits dèt ut mich geuf
ich weit dèt ut mich geuf in dich
doe wits dèt ich weit dèt ut mich geuf in dich
dèt ut dich geuf in mich

goan loate um neit te vergoan

èns woar ut gemaekelik
ich deich mien oage toew
ich sjtung aan de randj van unne onmaetbare
deipe aafgrunjd
unger aan mien vuit veil unne bruujsjende struim umleeg
ich zuchde èns deip
oeoeaahaaaahiaaaaaiaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaah

is waas te noch wits gèt was te höbs of gèt waas te bès verloare?

ut bewies
dèt de wèlt unne oalifant is
dae op un eij sjteit

vervaeling vervelling
dwank van den toemel loate aafrutsje
ei pantser aafsjtruipe
oetriete en van boete dreeje
naaksj waere

laegte
de laegte van laeve
de laegte van dood
de laegte van beweige
de laegte van verlange

un vraem sjproak
vrit mien beelde
spiejt ze oet
sjtum
in ein vraem welt

drieventaere in den tooter
vuil ich geine grundj
niks um mich vas te sjnappe

kaere van gedachtewolke
beelde zunger vastigheid

un zach zèngende kaer
zoo lich zo dun gezjwulle dèt alle
rundjum zjweevende gedachte sjtil wegzjweeve
noa woo me neit kent denke

miljarde flarde verangerentaere aan ein sjtök door

verbeelding geuf ut neit
zunger verbeelding geuf ut niks
zeen is verbeelding
zeen door verbeelding

irges aan de rènj geit mien waeze

woo zeen diej angere?
ze zeen
allein

unne gank
unne lien
van niks noa nirge